sabr-o-sukun kahan hai tere intizar mein

sabr-o-sukūñ kahāñ hai tire intizār meñ

dil iḳhtiyār meñ na nazar iḳhtiyār meñ

furqat kī baat tak bhī gavāra na thī jise

taare vo gin rahā hai shab-e-intizār meñ

allāh re ye bāda-e-rañgīñ kī shoḳhiyāñ

zāhid ko piinī paḌ ga.ī ab kī bahār meñ

yād-e-jamāl-e-dost ke qurbān jā.iye

taskīn pā rahā huuñ dil-e-be-qarār meñ

jab tum ho mere paas ḳhizāñ bhī bahār hai

tum hī nahīñ to kaise lage dil bahār meñ

'jauhar' vo aaj aa.e haiñ thāme hue jigar

kitnā asar hai nāla-e-be-iḳhtiyār meñ

sabr-o-sukun kahan hai tere intizar mein

dil iKHtiyar mein na nazar iKHtiyar mein

furqat ki baat tak bhi gawara na thi jise

tare wo gin raha hai shab-e-intizar mein

allah re ye baada-e-rangin ki shoKHiyan

zahid ko pini paD gai ab ki bahaar mein

yaad-e-jamal-e-dost ke qurban jaiye

taskin pa raha hun dil-e-be-qarar mein

jab tum ho mere pas KHizan bhi bahaar hai

tum hi nahin to kaise lage dil bahaar mein

'jauhar' wo aaj aae hain thame hue jigar

kitna asar hai nala-e-be-iKHtiyar mein