sabr-o-sukun-o-hosh gae intizar mein

sabr-o-sukūn-o-hosh ga.e intizār meñ

ab kuchh nahīñ rahā hai mire iḳhtiyār meñ

ham is tarah rahe chaman-e-rozgār meñ

sūkhe kabhī ḳhizāñ meñ na phūle bahār meñ

aa jān-e-ārzū ki tire intizār meñ

gulshan meñ dilkashī na kashish lāla-zār meñ

kunj-e-qafas meñ ātish-e-gul ne ġhazab kiyā

chāroñ taraf se aag lagā dī bahār meñ

kahtā hai aur kis ko safar-dar-vatan jahāñ

maiñ ajnabī huuñ āj-kal apne dayār meñ

mai-ḳhāna-e-alast se elaan ho gayā

saaqī kā izn-e-ām hai ab kī bahār meñ

kis kī naved-e-āmad-o-āmad hai ai ḳhudā

kyoñ aag sī lagī hai tanaffus ke taar meñ

jo chāhtā hai kartā hai vo kārsāz hai

kis ko hai daḳhl marzī-e-parvardigār meñ

sham-e-hayāt bujh ga.ī yā dil bujhā 'qadīr'

yā inqalāb ho gayā lail-o-nahār meñ

sabr-o-sukun-o-hosh gae intizar mein

ab kuchh nahin raha hai mere iKHtiyar mein

hum is tarah rahe chaman-e-rozgar mein

sukhe kabhi KHizan mein na phule bahaar mein

aa jaan-e-arzu ki tere intizar mein

gulshan mein dilkashi na kashish lala-zar mein

kunj-e-qafas mein aatish-e-gul ne ghazab kiya

chaaron taraf se aag laga di bahaar mein

kahta hai aur kis ko safar-dar-watan jahan

main ajnabi hun aaj-kal apne dayar mein

mai-KHana-e-alast se elan ho gaya

saqi ka izn-e-am hai ab ki bahaar mein

kis ki nawed-e-amad-o-amad hai ai KHuda

kyon aag si lagi hai tanaffus ke tar mein

jo chahta hai karta hai wo karsaz hai

kis ko hai daKHl marzi-e-parwardigar mein

sham-e-hayat bujh gai ya dil bujha 'qadir'

ya inqalab ho gaya lail-o-nahaar mein