sabt hai chehron pe chup ban mein andhera ho chuka

sabt hai chehroñ pe chup ban meñ añdherā ho chukā

dekhne aa.e ho kyā logo tamāshā ho chukā

aabrū ke surḳh motī phir se kaale paḌ ga.e

jism ke andar lahū kā rañg piilā ho chukā

hasratoñ ke peḌ sab ke sar se ūñche ho ga.e

aarzū kā zaḳhm pahle se bhī gahrā ho chukā

phir mujhe nādīdanī zanjīr pahnā.ī ga.ī

ilm tak mujh ko nahīñ aur merā saudā ho chukā

bar-sar-e-paikār apne-āp se huuñ kyā karūñ

merā dushman bhī mirī miTTī se paidā ho chukā

kaise TuuTe haiñ diloñ ke bāhamī rishte na pūchh

hai nagar ābād aur har shaḳhs tanhā ho chukā

tum kahe jaate ho aisī fasl-e-gul aa.ī nahīñ

aur agar maiñ ye kahūñ sau baar aisā ho chukā

kaun huuñ maiñ apnī sūrat bhī na pahchānī ga.ī

ā.īna takte hue mujh ko zamāna ho chukā

dekhnā ye hai ki us ke māvarā kyā chiiz hai

ye umīd-o-bīm kā daftar purānā ho chukā

kab talak dil meñ jagah doge havā ke ḳhauf ko

bādbāñ kholo ki mausam kā ishāra ho chukā

ab zabāñ se bhī kaho 'shahzād' kyuuñ ḳhāmosh ho

dil meñ jo kuchh thā vo āñkhoñ se huvaidā ho chukā

sabt hai chehron pe chup ban mein andhera ho chuka

dekhne aae ho kya logo tamasha ho chuka

aabru ke surKH moti phir se kale paD gae

jism ke andar lahu ka rang pila ho chuka

hasraton ke peD sab ke sar se unche ho gae

aarzu ka zaKHm pahle se bhi gahra ho chuka

phir mujhe nadidani zanjir pahnai gai

ilm tak mujh ko nahin aur mera sauda ho chuka

bar-sar-e-paikar apne-ap se hun kya karun

mera dushman bhi meri miTTi se paida ho chuka

kaise TuTe hain dilon ke bahami rishte na puchh

hai nagar aabaad aur har shaKHs tanha ho chuka

tum kahe jate ho aisi fasl-e-gul aai nahin

aur agar main ye kahun sau bar aisa ho chuka

kaun hun main apni surat bhi na pahchani gai

aaina takte hue mujh ko zamana ho chuka

dekhna ye hai ki us ke mawara kya chiz hai

ye umid-o-bim ka daftar purana ho chuka

kab talak dil mein jagah doge hawa ke KHauf ko

baadban kholo ki mausam ka ishaara ho chuka

ab zaban se bhi kaho 'shahzad' kyun KHamosh ho

dil mein jo kuchh tha wo aankhon se huwaida ho chuka