sabza pamal kali shaKH pe murjhai hai

sabza pāmāl kalī shāḳh pe murjhā.ī hai

aur hai shor ki gulshan meñ bahār aa.ī hai

zabt-e-ġham karne se baḌhtī hai jalan siine kī

aur kuchh khul ke jo kahtā huuñ to rusvā.ī hai

sach hai paanī nahīñ kartā kabhī patthar pe asar

mere rone pe sitamgar ko hañsī aa.ī hai

mil ga.ī ishq ko kaunain kī daulat ai dost

husn ne aaj mohabbat kī qasam khaa.ī hai

vo idhar aa.e idhar raat ne dam toḌ diyā

haa.e kis vaqt sitāroñ ko bhī niiñd aa.ī hai

kyuuñ na ho zer-o-zabar aql-o-ḳhirad kī duniyā

sau qayāmat kī qayāmat tirī añgḌā.ī hai

maiñ karūñ tum se gilā ye mirā sheva hī nahīñ

baat hī baat meñ ye baat nikal aa.ī hai

'soz' dīvāna thā dāman kī ḳhabar kyā rakhtā

aap ne zulf-e-siyah kis liye bikhrā.ī hai

sabza pamal kali shaKH pe murjhai hai

aur hai shor ki gulshan mein bahaar aai hai

zabt-e-gham karne se baDhti hai jalan sine ki

aur kuchh khul ke jo kahta hun to ruswai hai

sach hai pani nahin karta kabhi patthar pe asar

mere rone pe sitamgar ko hansi aai hai

mil gai ishq ko kaunain ki daulat ai dost

husn ne aaj mohabbat ki qasam khai hai

wo idhar aae idhar raat ne dam toD diya

hae kis waqt sitaron ko bhi nind aai hai

kyun na ho zer-o-zabar aql-o-KHirad ki duniya

sau qayamat ki qayamat teri angDai hai

main karun tum se gila ye mera shewa hi nahin

baat hi baat mein ye baat nikal aai hai

'soz' diwana tha daman ki KHabar kya rakhta

aap ne zulf-e-siyah kis liye bikhrai hai