sach hua KHwab to tabir nahin khinch saka

sach huā ḳhvāb to tā'bīr nahīñ khīñch sakā

maiñ tire jism pe tahrīr nahīñ khīñch sakā

maiñ ne chāhā thā tire dard se mahzūz rahūñ

dard bhī vo ki jise 'mīr' nahīñ khīñch sakā

muddatoñ baa'd tire saath kisī ko dekhā

itnā ghabrāyā ki tasvīr nahīñ khīñch sakā

vo nazar aa.ī mujhe rail kī khiḌkī se magar

tai-shuda vaqt meñ zanjīr nahīñ khīñch sakā

roz laḌtā huuñ maiñ ḳhud apne hī saa.e ke ḳhilāf

vo shajar huuñ ki jo rahgīr nahīñ khīñch sakā

tere shāne ko mayassar haiñ sabhī sar lekin

apne shāne meñ vo tāsīr nahīñ khīñch sakā

sach hua KHwab to ta'bir nahin khinch saka

main tere jism pe tahrir nahin khinch saka

main ne chaha tha tere dard se mahzuz rahun

dard bhi wo ki jise 'mir' nahin khinch saka

muddaton ba'd tere sath kisi ko dekha

itna ghabraya ki taswir nahin khinch saka

wo nazar aai mujhe rail ki khiDki se magar

tai-shuda waqt mein zanjir nahin khinch saka

roz laDta hun main KHud apne hi sae ke KHilaf

wo shajar hun ki jo rahgir nahin khinch saka

tere shane ko mayassar hain sabhi sar lekin

apne shane mein wo tasir nahin khinch saka