jhuT kah kar bhi wo masnad pe jagah pata hai

jhuuT kah kar bhī vo masnad pe jagah paatā hai

aur mujh ko pas-e-dīvār chunā jaatā hai

us kī is baat pe mujh ko na yaqīñ aa.egā

vo taḌaptā hai mohabbat meñ marā jaatā hai

kaam aate haiñ bure vaqt meñ apne bhaa.ī

aur dushman bhī to bhaa.ī ko kahā jaatā hai

go samajhne meñ zarā der to lagtī hai par

vaqt duniyā ke sabhī rang dikhā jaatā hai

bevafā.ī ke sabhī rang dikhā.e tū ne

soch kar ḳhuun mire dil kā huā jaatā hai

jhuuT go bol rahā hai tū bahut himmat se

tere chehre kā magar rang uḌā jaatā hai

itnī shiddat na thī pahle to kisī jazbe meñ

yaad vo aa.e to aatā hī chalā jaatā hai

aa sikhā degī tujhe 'shamsa' mohabbat kā chalan

kaise har lamha mohabbat meñ jiyā jaatā hai

jhuT kah kar bhi wo masnad pe jagah pata hai

aur mujh ko pas-e-diwar chuna jata hai

us ki is baat pe mujh ko na yaqin aaega

wo taDapta hai mohabbat mein mara jata hai

kaam aate hain bure waqt mein apne bhai

aur dushman bhi to bhai ko kaha jata hai

go samajhne mein zara der to lagti hai par

waqt duniya ke sabhi rang dikha jata hai

bewafai ke sabhi rang dikhae tu ne

soch kar KHun mere dil ka hua jata hai

jhuT go bol raha hai tu bahut himmat se

tere chehre ka magar rang uDa jata hai

itni shiddat na thi pahle to kisi jazbe mein

yaad wo aae to aata hi chala jata hai

aa sikha degi tujhe 'shamsa' mohabbat ka chalan

kaise har lamha mohabbat mein jiya jata hai