sach kahte ho ek kahani kis kis se dohraoge

sach kahte ho ek kahānī kis kis se dohrāoge

jab bhī merā naam sunoge nā-vāqif ban jāoge

ret ke ghar se khelo jab bhī TūTegā ban jā.egā

dil se na khelo TuuT gayā to tum bhī khel na pāoge

tum to ḳhud bhī shīsha nikle tum se kyā ummīd kareñ

ham samjhe the parbat parbat tum patthar pighlāoge

chaḌhtā sūraj ghaTte ghaTte maġhrib meñ kho jaatā hai

is nagrī kī riit yahī hai tum bhī Thokar khāoge

āñkhoñ kī bastī ne tum ko shabnam naam se jaanā thā

kis ko ḳhabar thī dil nagrī meñ tum patthar kahlāoge

phūloñ se zaḳhmī haiñ rūheñ ab jismoñ kī baarī hai

pathrā.ī haiñ aas meñ āñkheñ kab patthar barsāoge

'naqvī' ghuum rahī hai dhartī tum bhī apnā kaam karo

yādoñ ke gumbad meñ āḳhir kab tak jī bahlāoge

sach kahte ho ek kahani kis kis se dohraoge

jab bhi mera nam sunoge na-waqif ban jaoge

ret ke ghar se khelo jab bhi TuTega ban jaega

dil se na khelo TuT gaya to tum bhi khel na paoge

tum to KHud bhi shisha nikle tum se kya ummid karen

hum samjhe the parbat parbat tum patthar pighlaoge

chaDhta suraj ghaTte ghaTte maghrib mein kho jata hai

is nagri ki rit yahi hai tum bhi Thokar khaoge

aankhon ki basti ne tum ko shabnam nam se jaana tha

kis ko KHabar thi dil nagri mein tum patthar kahlaoge

phulon se zaKHmi hain ruhen ab jismon ki bari hai

pathrai hain aas mein aankhen kab patthar barsaoge

'naqwi' ghum rahi hai dharti tum bhi apna kaam karo

yaadon ke gumbad mein aaKHir kab tak ji bahlaoge