sach ki KHatir sab kuchh khoya kaun likhega

sach kī ḳhātir sab kuchh khoyā kaun likhegā

merā ye be-kaif sā qissa kaun likhegā

yuuñ to har kāñdhe par ik chehra hai lekin

kis ke paas hai apnā chehra kaun likhegā

barf pighal kar dariyā to tuġhyānī laa.e

kyuuñ chaḌhtā hai vaqt kā dariyā kaun likhegā

dasht-navardī kā qissa to sab likhte haiñ

kis ghar meñ hai kitnā sahrā kaun likhegā

sāmne jo hālāt haiñ un sab ke hone meñ

kitnā kuchh hai kis kā hissa kaun likhegā

ḳhushk huā ehsās kā ḳhāma ab aise meñ

kyā hotā hai dard kā rishta kaun likhegā

roz-o-shab ke beach tasādum meñ ai hamdam

sūraj kā kirdār hai kaisā kaun likhegā

abr-e-siyah to jhuum ke aayā lekin 'arshad'

kis bastī par kitnā barsā kaun likhegā

sach ki KHatir sab kuchh khoya kaun likhega

mera ye be-kaif sa qissa kaun likhega

yun to har kandhe par ek chehra hai lekin

kis ke pas hai apna chehra kaun likhega

barf pighal kar dariya to tughyani lae

kyun chaDhta hai waqt ka dariya kaun likhega

dasht-nawardi ka qissa to sab likhte hain

kis ghar mein hai kitna sahra kaun likhega

samne jo haalat hain un sab ke hone mein

kitna kuchh hai kis ka hissa kaun likhega

KHushk hua ehsas ka KHama ab aise mein

kya hota hai dard ka rishta kaun likhega

roz-o-shab ke beach tasadum mein ai hamdam

suraj ka kirdar hai kaisa kaun likhega

abr-e-siyah to jhum ke aaya lekin 'arshad'

kis basti par kitna barsa kaun likhega