sach to ye hai ki use dhup ne garmaya tha

sach to ye hai ki use dhuup ne garmāyā thā

haañ vo paudā jo tirī chhāñv meñ kumhlāyā thā

raat kis ne mirī tanhā.ī ko mahkāyā thā

bū-e-gul aa.ī thī yā terā ḳhayāl aayā thā

dekhne vaale vo manzar nahīñ bhūle ab tak

maiñ kabhī aap kī āñkhoñ meñ nazar aayā thā

kitne qissoñ ko diyā janm tire ashkoñ ne

maiñ bahut ḳhush thā ki dāman mirā kaam aayā thā

kuchh ḳhayāl aayā sarāboñ meñ bhaTakne vaale

kis kī āvāz ne dariyā pe tujhe laayā thā

ab to behtar hai yahī kuchh bhī na yaad aa.e 'na.īm'

mausam-e-gul meñ kise khoyā thā kyā paayā thā

sach to ye hai ki use dhup ne garmaya tha

han wo pauda jo teri chhanw mein kumhlaya tha

raat kis ne meri tanhai ko mahkaya tha

bu-e-gul aai thi ya tera KHayal aaya tha

dekhne wale wo manzar nahin bhule ab tak

main kabhi aap ki aankhon mein nazar aaya tha

kitne qisson ko diya janm tere ashkon ne

main bahut KHush tha ki daman mera kaam aaya tha

kuchh KHayal aaya sarabon mein bhaTakne wale

kis ki aawaz ne dariya pe tujhe laya tha

ab to behtar hai yahi kuchh bhi na yaad aae 'naim'

mausam-e-gul mein kise khoya tha kya paya tha