sach yahi hai ki karam jis pe KHuda karta hai

sach yahī hai ki karam jis pe ḳhudā kartā hai

har bulandī ko vahī shaḳhs chhuā kartā hai

har taraf tū hī mire saath dikhe hai mujh ko

ab hamesha yahī ehsās huā kartā hai

koshishoñ se hī ujāle haiñ jahāñ meñ qaa.em

shams chhuptā hai magar roz ugā kartā hai

dhundh yuuñ hī to fazāoñ meñ nahīñ hai taarī

aag lagtī hai dhuāñ tab hī uThā kartā hai

maañ ye kahtī hai mirī 'umr bhī lag jaa.e tujhe

kaun kis ke liye varna ye du'ā kartā hai

kāmyābī pe bahut apnī maiñ itrātā huuñ

asliyat ye hai jo kartā hai ḳhudā kartā hai

maqsad-e-zīst hai apnā to mohabbat 'hashmat'

sirf ye lafz hī nafrat se judā kartā hai

sach yahi hai ki karam jis pe KHuda karta hai

har bulandi ko wahi shaKHs chhua karta hai

har taraf tu hi mere sath dikhe hai mujh ko

ab hamesha yahi ehsas hua karta hai

koshishon se hi ujale hain jahan mein qaem

shams chhupta hai magar roz uga karta hai

dhundh yun hi to fazaon mein nahin hai tari

aag lagti hai dhuan tab hi uTha karta hai

man ye kahti hai meri 'umr bhi lag jae tujhe

kaun kis ke liye warna ye du'a karta hai

kaamyabi pe bahut apni main itraata hun

asliyat ye hai jo karta hai KHuda karta hai

maqsad-e-zist hai apna to mohabbat 'hashmat'

sirf ye lafz hi nafrat se juda karta hai