sad-haif adam ko Thukra kar hasti ki ziyarat kar baiThe

sad-haif adam ko Thukrā kar hastī kī ziyārat kar baiThe

nādāñ the ham nādānī meñ jiine kī himāqat kar baiThe

ḳhāliq ne navāzā roz-e-azal kis tarah hameñ kyā batlā.eñ

lekin jo amānat paa.ī thī ham us meñ ḳhayānat kar baiThe

is des meñ jab har rahzan ko rahbar kā sharaf paate dekhā

qadroñ ke muhāfiz ho kar bhī qadroñ se baġhāvat kar baiThe

nau-ḳhez guloñ ke aariz par jo maut kī zardī le aa.ī

us bād-e-sabā se ghabrā kar tūfāñ se mohabbat kar baiThe

vo daur gayā jab zālim ko mā.il-ba-karam kartī thī vafā

ham kar ke mohabbat dushman se sāmān-e-qayāmat kar baiThe

āzār na jaane kitne the 'shāfī' se mudāvā kyā hotā

tauhīd ke dīvāne the magar asnām kī taa.at kar baiThe

sad-haif adam ko Thukra kar hasti ki ziyarat kar baiThe

nadan the hum nadani mein jine ki himaqat kar baiThe

KHaliq ne nawaza roz-e-azal kis tarah hamein kya batlaen

lekin jo amanat pai thi hum us mein KHayanat kar baiThe

is des mein jab har rahzan ko rahbar ka sharaf pate dekha

qadron ke muhafiz ho kar bhi qadron se baghawat kar baiThe

nau-KHez gulon ke aariz par jo maut ki zardi le aai

us baad-e-saba se ghabra kar tufan se mohabbat kar baiThe

wo daur gaya jab zalim ko mail-ba-karam karti thi wafa

hum kar ke mohabbat dushman se saman-e-qayamat kar baiThe

aazar na jaane kitne the 'shafi' se mudawa kya hota

tauhid ke diwane the magar asnam ki taat kar baiThe