sada-e-jars hun na aah-e-na-rasa hun main

sadā-e-jars huuñ na āh-e-nā-rasā huuñ maiñ

naqīb-e-sub.h-e-bahārāñ hai vo sadā huuñ maiñ

ba-faiz-e-'ishq yahāñ tak pahuñch gayā huuñ maiñ

harīm-e-nāz kā bhī rāz-āshnā huuñ maiñ

havā meñ uḌtī huī gard-e-ḳhāk-e-pā huuñ maiñ

ḳhirad kī aañkh se dekho to kīmiyā huuñ maiñ

haiñ ḳhizr jis ke liye garm-e-justujū ab bhī

hai rahnumā sar-e-manzil vo naqsh-e-pā huuñ maiñ

yahīñ pe ḳhatm nahīñ merī justujū kā safar

abhī to duur se manzil ko dekhtā huuñ maiñ

jhukī nigāh ne kyā kah diyā hai ye dil se

junūn-e-shauq kī had se guzar gayā huuñ maiñ

ġham-e-zamāna ye kyā gul khilā gayā 'naġhmī'

har ek chehra fasurda hai dekhtā huuñ maiñ

sada-e-jars hun na aah-e-na-rasa hun main

naqib-e-subh-e-bahaaran hai wo sada hun main

ba-faiz-e-'ishq yahan tak pahunch gaya hun main

harim-e-naz ka bhi raaz-ashna hun main

hawa mein uDti hui gard-e-KHak-e-pa hun main

KHirad ki aankh se dekho to kimiya hun main

hain KHizr jis ke liye garm-e-justuju ab bhi

hai rahnuma sar-e-manzil wo naqsh-e-pa hun main

yahin pe KHatm nahin meri justuju ka safar

abhi to dur se manzil ko dekhta hun main

jhuki nigah ne kya kah diya hai ye dil se

junun-e-shauq ki had se guzar gaya hun main

gham-e-zamana ye kya gul khila gaya 'naghmi'

har ek chehra fasurda hai dekhta hun main