sada-e-rahguzar ko taras gaya hun main

sadā-e-rāhguzar ko taras gayā huuñ maiñ

tumhāre saath safar ko taras gayā huuñ meñ

na jaane kyā huī mujh se kisī kī haq-talfī

lagā ke peḌ samar ko taras gayā huuñ maiñ

shajar pe baiThe parinde uḌā diye the kabhī

ab apne ghar meñ bhī ghar ko taras gayā huuñ maiñ

harām rozī kā luqma chabā liyā thā kabhī

duā.eñ kar ke asar ko taras gayā huuñ maiñ

uThā jo sar se mire vāldain kā saaya

to ik shafīq nazar ko taras gayā huuñ maiñ

mire nasīb ko tārīkiyoñ ne gher liyā

vo shab milī ki sahar ko taras gayā huuñ maiñ

zamīñ ke chāñd kā dīdār kyā huā 'shaidā'

to āsmāñ ke qamar ko taras gayā huuñ maiñ

sada-e-rahguzar ko taras gaya hun main

tumhaare sath safar ko taras gaya hun mein

na jaane kya hui mujh se kisi ki haq-talfi

laga ke peD samar ko taras gaya hun main

shajar pe baiThe parinde uDa diye the kabhi

ab apne ghar mein bhi ghar ko taras gaya hun main

haram rozi ka luqma chaba liya tha kabhi

duaen kar ke asar ko taras gaya hun main

uTha jo sar se mere waldain ka saya

to ek shafiq nazar ko taras gaya hun main

mere nasib ko tarikiyon ne gher liya

wo shab mili ki sahar ko taras gaya hun main

zamin ke chand ka didar kya hua 'shaida'

to aasman ke qamar ko taras gaya hun main