sadaqat ki yahan girti hui diwar dekhi hai

sadāqat kī yahāñ girtī huī dīvār dekhī hai

sitam kī jiit dekhī hai karam kī haar dekhī hai

ġharīboñ kī hī kashtī ko hamesha Dūbte dekhā

amīr-e-shahr kī kashtī hamesha paar dekhī hai

amīr-e-shahr un āñkhoñ meñ kitnā mohtaram hai tū

jin āñkhoñ ne tirī zillat sar-e-bāzār dekhī hai

in āñkhoñ ne sar-e-neza koī bhī sar nahīñ dekhā

magar dushman ke qadmoñ meñ phir ik dastār dekhī hai

ḳhamoshī ko hamārī bai'at-o-tā.īd mat samjho

agar tum ne hamārī jur.at-e-inkār dekhī hai

buzurgoñ ne hamāre jis pe sūra-fat.h likkhā thā

ajā.ib ghar meñ kal 'tashna' vahī talvār dekhī hai

sadaqat ki yahan girti hui diwar dekhi hai

sitam ki jit dekhi hai karam ki haar dekhi hai

gharibon ki hi kashti ko hamesha Dubte dekha

amir-e-shahr ki kashti hamesha par dekhi hai

amir-e-shahr un aankhon mein kitna mohtaram hai tu

jin aankhon ne teri zillat sar-e-bazar dekhi hai

in aankhon ne sar-e-neza koi bhi sar nahin dekha

magar dushman ke qadmon mein phir ek dastar dekhi hai

KHamoshi ko hamari bai'at-o-taid mat samjho

agar tum ne hamari jurat-e-inkar dekhi hai

buzurgon ne hamare jis pe sura-fath likkha tha

ajaib ghar mein kal 'tashna' wahi talwar dekhi hai