sadiyan guzar din yahan lamhe ko kaT kar

sadiyāñ guzār diiñ yahāñ lamhe ko kaaT kar

rasta banā chukā huuñ maiñ raste ko kaaT kar

jo bhī qarīb us ke gayā vo jhulas gayā

rakkhā ho jaise jism meñ sho'le ko kaaT kar

talvār kā jo kaam thā nazroñ se le gayā

hoñToñ kā vaar kar diyā barchhe ko kaaT kar

rakhnā hai kis tarah mujhe girdāb kā vujūd

sīkhā hai maiñ ne kaam ye raqbe ko kaaT kar

ye lafz jo haiñ she'r ke qatre haiñ ḳhuun ke

hotā hai ek misra' kaleje ko kaaT kar

bistar pe merī aahoñ kī lāsheñ sulag rahīñ

dekhā hai maiñ ne raat ye takiye ko kaaT kar

ik roz khul ga.ī mirī raftār kī giraft

aage nikal gayā bure achchhe ko kaaT kar

pahle banāyā zāviya is dil meñ qaid kā

phir ghar banā liyā usī piñjre ko kaaT kar

is raushnī kī lau se dhuāñ dāġh-dār thā

jaltā charāġh gul kiyā dhāge ko kaaT kar

shiddat-pasand shaḳhs thā jis ko thā mujh se pyaar

siine ko nochtā thā vo kurte ko kaaT kar

us kī daġhā thī jis meñ du'ā hī 'muqīm' thī

samjhā liyā hai ḳhud ko ye nuqte ko kaaT kar

sadiyan guzar din yahan lamhe ko kaT kar

rasta bana chuka hun main raste ko kaT kar

jo bhi qarib us ke gaya wo jhulas gaya

rakkha ho jaise jism mein sho'le ko kaT kar

talwar ka jo kaam tha nazron se le gaya

honTon ka war kar diya barchhe ko kaT kar

rakhna hai kis tarah mujhe girdab ka wujud

sikha hai main ne kaam ye raqbe ko kaT kar

ye lafz jo hain she'r ke qatre hain KHun ke

hota hai ek misra' kaleje ko kaT kar

bistar pe meri aahon ki lashen sulag rahin

dekha hai main ne raat ye takiye ko kaT kar

ek roz khul gai meri raftar ki giraft

aage nikal gaya bure achchhe ko kaT kar

pahle banaya zawiya is dil mein qaid ka

phir ghar bana liya usi pinjre ko kaT kar

is raushni ki lau se dhuan dagh-dar tha

jalta charagh gul kiya dhage ko kaT kar

shiddat-pasand shaKHs tha jis ko tha mujh se pyar

sine ko nochta tha wo kurte ko kaT kar

us ki dagha thi jis mein du'a hi 'muqim' thi

samjha liya hai KHud ko ye nuqte ko kaT kar