sadiyon ke rang-o-bu ko na DhunDo guphaon mein

sadiyoñ ke rañg-o-bū ko na DhūñDo guphāoñ meñ

aao kisī se pūchho pata un kā gaañv meñ

ghabrā ke bulbule ne samundar kī zaat se

phailā diyā vajūd ko saarī dishāoñ meñ

āvāz ḳhud ko do to mile kuchh javāb bhī

āḳhir pukārte ho kise tum ḳhalāoñ meñ

DhūñDo to devtāoñ ke ādarsh haiñ bahut

par aadmī kā rañg kahāñ devtāoñ meñ

jogī ko aaj ruup kā vardān mil gayā

Thahrā jo do ghaḌī tire pīpal kī chhāñv meñ

thā naaz mujh ko jis kī shanāsā.ī par vahī

phailā rahā hai zahr mire āshnāoñ meñ

aaseb hasratoñ kā unheñ khaa.e hai 'salīm'

kaTtī thī jin kī raat kabhī apsarāoñ meñ

sadiyon ke rang-o-bu ko na DhunDo guphaon mein

aao kisi se puchho pata un ka ganw mein

ghabra ke bulbule ne samundar ki zat se

phaila diya wajud ko sari dishaon mein

aawaz KHud ko do to mile kuchh jawab bhi

aaKHir pukarte ho kise tum KHalaon mein

DhunDo to dewtaon ke aadarsh hain bahut

par aadmi ka rang kahan dewtaon mein

jogi ko aaj rup ka wardan mil gaya

Thahra jo do ghaDi tere pipal ki chhanw mein

tha naz mujh ko jis ki shanasai par wahi

phaila raha hai zahr mere aashnaon mein

aaseb hasraton ka unhen khae hai 'salim'

kaTti thi jin ki raat kabhi apsaraon mein