sadiyon ki gahri mahrumi rahm-o-karam bana kar de

sadiyoñ kī gahrī mahrūmī rahm-o-karam banā kar de

aadhā ḳhuld-e-barīñ meñ yā-rab aadhā ḳhāk-e-zamīñ par de

mausam ke hamrāh chale aate haiñ kuchh andeshe bhī

ek kushāda chhat ke nīche puḳhta dīvār-o-dar de

mahak rahī haiñ har bastī meñ aam aur jāmun kī fasleñ

bachche kyoñ ḳhāmosh khaḌe haiñ sab ke haath meñ patthar de

sab ko sab kuchh dene vaale maiñ bhī ek bhikārī huuñ

bin māñge bin haath pasāre tū merā dāman bhar de

us ke har goshe se mujh ko apnī hī ḳhushbū aa.e

jo ghar kī tārīf meñ aa.e armānoñ ko vo ghar de

jaane kyā kyā maañg rahā hai bachchoñ kā bedār shu.ūr

angāroñ par ḳhushbū dahkā sahrā biich samundar de

aise kapḌe pahnā mujh ko jo āñkhoñ ko bhale lageñ

ghās-phūs kī dīvāroñ ko ghās-phūs kā chhappar de

jo bhī guzrā jaisā guzrā maiñ ne sab kuchh jhel liyā

be-pāyāñ rahmat ke saa.e ab bachchoñ ke sar par de

mujh se apne hī zaḳhmoñ kā bojh nahīñ uThtā 'parvāz'

jitnā jo hai vo kaafī hai kuchh na andar bāhar de

sadiyon ki gahri mahrumi rahm-o-karam bana kar de

aadha KHuld-e-barin mein ya-rab aadha KHak-e-zamin par de

mausam ke hamrah chale aate hain kuchh andeshe bhi

ek kushada chhat ke niche puKHta diwar-o-dar de

mahak rahi hain har basti mein aam aur jamun ki faslen

bachche kyon KHamosh khaDe hain sab ke hath mein patthar de

sab ko sab kuchh dene wale main bhi ek bhikari hun

bin mange bin hath pasare tu mera daman bhar de

us ke har goshe se mujh ko apni hi KHushbu aae

jo ghar ki tarif mein aae armanon ko wo ghar de

jaane kya kya mang raha hai bachchon ka bedar shuur

angaron par KHushbu dahka sahra bich samundar de

aise kapDe pahna mujh ko jo aankhon ko bhale lagen

ghas-phus ki diwaron ko ghas-phus ka chhappar de

jo bhi guzra jaisa guzra main ne sab kuchh jhel liya

be-payan rahmat ke sae ab bachchon ke sar par de

mujh se apne hi zaKHmon ka bojh nahin uThta 'parwaz'

jitna jo hai wo kafi hai kuchh na andar bahar de