saDken chauDi raste lambe hote jate hain

saḌkeñ chauḌī raste lambe hote jaate haiñ

duur musāfir apne ghar se hote jaate haiñ

bīmārī meñ uTh ga.e aur sach maan liyā sab ne

ham ne jhuuT kahā thā achchhe hote jaate haiñ

kitne sapne mil kar ham ne saath meñ dekhe the

ab kuchh tere aur kuchh mere hote jaate haiñ

hairat se mat dekho ham sāda-dil logoñ ko

rafta-rafta ham tum jaise hote jaate haiñ

shor-sharābe se mahfil meñ sar-garmī hai par

ahl-e-mahfil gūñge bahre hote jaate haiñ

kam se kam shatranj ke mohroñ sā khelā jaa.e

ye kyā hai ham taash ke patte hote jaate haiñ

'zarra' apnā kahne ko tanhā.ī hī hogī

hote hote log parā.e hote jaate haiñ

saDken chauDi raste lambe hote jate hain

dur musafir apne ghar se hote jate hain

bimari mein uTh gae aur sach man liya sab ne

hum ne jhuT kaha tha achchhe hote jate hain

kitne sapne mil kar hum ne sath mein dekhe the

ab kuchh tere aur kuchh mere hote jate hain

hairat se mat dekho hum sada-dil logon ko

rafta-rafta hum tum jaise hote jate hain

shor-sharabe se mahfil mein sar-garmi hai par

ahl-e-mahfil gunge bahre hote jate hain

kam se kam shatranj ke mohron sa khela jae

ye kya hai hum tash ke patte hote jate hain

'zarra' apna kahne ko tanhai hi hogi

hote hote log parae hote jate hain