saDkon pe bahut KHalq-e-KHuda dekhte rahna

saḌkoñ pe bahut ḳhalq-e-ḳhudā dekhte rahnā

kyā chiiz hai jiine kī sazā dekhte rahnā

bah jaanā ḳhamoshī se kahīñ dard kā paanī

aur dil ko sadā ḳhushk paḌā dekhte rahnā

milne ke liye jaanā use shauq se lekin

is ruḳh pe uḌā rañg-e-vafā dekhte rahnā

le jaanā use bazm-e-nigārāñ meñ vahāñ phir

kab aa.e nazar sab se judā dekhte rahnā

mumkin hai ki mil jaa.e kabhī koī ishārā

mausam kī ye be-mehr adā dekhte rahnā

kamre meñ paḌe rahnā ghuTan oḌh ke 'shāhīn'

dīvāroñ pe tasvīr-e-havā dekhte rahnā

saDkon pe bahut KHalq-e-KHuda dekhte rahna

kya chiz hai jine ki saza dekhte rahna

bah jaana KHamoshi se kahin dard ka pani

aur dil ko sada KHushk paDa dekhte rahna

milne ke liye jaana use shauq se lekin

is ruKH pe uDa rang-e-wafa dekhte rahna

le jaana use bazm-e-nigaran mein wahan phir

kab aae nazar sab se juda dekhte rahna

mumkin hai ki mil jae kabhi koi ishaara

mausam ki ye be-mehr ada dekhte rahna

kamre mein paDe rahna ghuTan oDh ke 'shahin'

diwaron pe taswir-e-hawa dekhte rahna