saf-e-hayat se jab koi tishna-kaam aaya

saf-e-hayāt se jab koī tishna-kām aayā

nizām-e-sāqī-e-mahfil pe ittihām aayā

milā bhī to vo ġham-e-zindagī ke kaam aayā

mire liye har ik aañsū meñ ek jaam aayā

lab-e-kalīm pe aayā na phir savāl koī

hazār barq-e-pashemāñ kā phir payām aayā

adū ko baḳhsh diye ham ne kausar-o-tasnīm

ye kis ke hoñToñ ko chhū kar hamārā jaam aayā

khaḌā huuñ der se gum ziist ke dorāhe par

jo kārvāñ se chuTātā hai vo maqām aayā

koī musavvir-e-hastī kā shāhkār bhī hai

abhī talak to har ik naqsh-e-nā-tamām aayā

harīf ban ke jahāñ jab miTā sakā na hameñ

to dost ban ke mohabbat kā le ke naam aayā

mujhe miTā ke vo thoḌī hī der ḳhush se rahe

phir us ke ba.ad mohabbat kā intiqām aayā

ḳhushā vo sā.at-e-firdaus jab ki pahle pahal

kisī ke lab pe zarā ruk ke apnā naam aayā

rah-e-hayāt hai suunī maqām-e-ishq ke ba.ad

yahāñ talak to har ik dil subuk-ḳhirām aayā

hañsūñ ki ro.uuñ maiñ apnī hayāt par 'mullā'

havā se bach ke sahar tak charāġh-e-shām aayā

saf-e-hayat se jab koi tishna-kaam aaya

nizam-e-saqi-e-mahfil pe ittiham aaya

mila bhi to wo gham-e-zindagi ke kaam aaya

mere liye har ek aansu mein ek jam aaya

lab-e-kalim pe aaya na phir sawal koi

hazar barq-e-pasheman ka phir payam aaya

adu ko baKHsh diye hum ne kausar-o-tasnim

ye kis ke honTon ko chhu kar hamara jam aaya

khaDa hun der se gum zist ke dorahe par

jo karwan se chuTata hai wo maqam aaya

koi musawwir-e-hasti ka shahkar bhi hai

abhi talak to har ek naqsh-e-na-tamam aaya

harif ban ke jahan jab miTa saka na hamein

to dost ban ke mohabbat ka le ke nam aaya

mujhe miTa ke wo thoDi hi der KHush se rahe

phir us ke baad mohabbat ka intiqam aaya

KHusha wo saat-e-firdaus jab ki pahle pahal

kisi ke lab pe zara ruk ke apna nam aaya

rah-e-hayat hai suni maqam-e-ishq ke baad

yahan talak to har ek dil subuk-KHiram aaya

hansun ki roun main apni hayat par 'mulla'

hawa se bach ke sahar tak charagh-e-sham aaya