saf-e-matam pe jo hum nachne gane lag jaen

saf-e-mātam pe jo ham nāchne gaane lag jaa.eñ

gardish-e-vaqt! tire hosh Thikāne lag jaa.eñ

vo to vo us kī ma.īyat meñ guzārā huā pal

jo bhulā.eñ to bhulāne meñ zamāne lag jaa.eñ

mire qādir! jo tū chāhe to ye mumkin ho jaa.e

raftagāñ shahr-e-adam se yahāñ aane lag jaa.eñ

bazm-e-duniyā se chalūñ aisā na ho sab mire yaar

ek ek kar ke mujhe chhoḌ ke jaane lag jaa.eñ

ḳhvāhish-e-vasl! tirā kyā ho jo ham sāl-ba-sāl

ashra-e-soz ġham-e-hijr manāne lag jaa.eñ

ham samajh paa.e na 'fartāsh' mizāj-e-ḳhūbāñ

dil churā.eñ to kabhī āñkheñ churāne lag jaa.eñ

saf-e-matam pe jo hum nachne gane lag jaen

gardish-e-waqt! tere hosh Thikane lag jaen

wo to wo us ki maiyat mein guzara hua pal

jo bhulaen to bhulane mein zamane lag jaen

mere qadir! jo tu chahe to ye mumkin ho jae

raftagan shahr-e-adam se yahan aane lag jaen

bazm-e-duniya se chalun aisa na ho sab mere yar

ek ek kar ke mujhe chhoD ke jaane lag jaen

KHwahish-e-wasl! tera kya ho jo hum sal-ba-sal

ashra-e-soz gham-e-hijr manane lag jaen

hum samajh pae na 'fartash' mizaj-e-KHuban

dil churaen to kabhi aankhen churane lag jaen