safar hai umr-bhar ka sath mein saman kya karte

safar hai 'umr-bhar kā saath meñ sāmān kyā karte

jo mil jaate hameñ bhagvān to insān kyā karte

safar meñ Thokareñ khā kar haTā.e sang rāhoñ se

ab is se aur behtar rāste āsān kyā karte

dabe haiñ jo abhī dil meñ vahī armān haiñ dil ke

jo nikle haiñ mire armān vo armān kyā karte

Dubonā hī thā gar un ko safīna 'ishq kā mere

to ik qatra hī kaafī thā bhalā tūfān kyā karte

tire qadmoñ kī aahaT se tujhe ham jaan lete haiñ

batā ai zindagī ab aur ham pahchān kyā karte

safar hai 'umr-bhar ka sath mein saman kya karte

jo mil jate hamein bhagwan to insan kya karte

safar mein Thokaren kha kar haTae sang rahon se

ab is se aur behtar raste aasan kya karte

dabe hain jo abhi dil mein wahi arman hain dil ke

jo nikle hain mere arman wo arman kya karte

Dubona hi tha gar un ko safina 'ishq ka mere

to ek qatra hi kafi tha bhala tufan kya karte

tere qadmon ki aahaT se tujhe hum jaan lete hain

bata ai zindagi ab aur hum pahchan kya karte