safar hoga nahin jab KHak KHak uDti rahegi

safar hogā nahīñ jab ḳhaak ḳhaak uḌtī rahegī

misāl-e-gardish-e-aflāk ḳhaak uḌtī rahegī

tarīq-e-ishq meñ har-gām hai andesha-e-ġham

sañbhal chaliyo aziyyat-nāk ḳhaak uḌtī rahegī

badan kī hairatoñ se mat nikaliyo bārishoñ meñ

jal uTThī ye agar poshāk ḳhaak uḌtī rahegī

tamāshā-gar ye ātish-bāz saare be-ḳhabar haiñ

jo phailī aag ibrat-nāk ḳhaak uḌtī rahegī

bas ab kuchh din ḳhas-o-ḳhāshāk ho jā.egā sab kuchh

bas ab kuchh roz phir saffāk ḳhaak uḌtī rahegī

musāfir raah legā manziloñ kī aur aqab meñ

in āñkhoñ se bahut namnāk ḳhaak uḌtī rahegī

dikhā.ī bhī nahīñ degī badan ġharqāb karke

miyān-e-vasl ik chālāk ḳhaak uḌtī rahegī

dukān-e-dil baḌhā deñge agar bāzār meñ ham

barahna sar vahāñ bebāk ḳhaak uḌtī rahegī

koī tārāj karne bastiyāñ aa jā.egā aur

zamīñ hotī rahegī chaak ḳhaak uḌtī rahegī

safar hoga nahin jab KHak KHak uDti rahegi

misal-e-gardish-e-aflak KHak uDti rahegi

tariq-e-ishq mein har-gam hai andesha-e-gham

sanbhal chaliyo aziyyat-nak KHak uDti rahegi

badan ki hairaton se mat nikaliyo barishon mein

jal uTThi ye agar poshak KHak uDti rahegi

tamasha-gar ye aatish-baz sare be-KHabar hain

jo phaili aag ibrat-nak KHak uDti rahegi

bas ab kuchh din KHas-o-KHashak ho jaega sab kuchh

bas ab kuchh roz phir saffak KHak uDti rahegi

musafir rah lega manzilon ki aur aqab mein

in aankhon se bahut namnak KHak uDti rahegi

dikhai bhi nahin degi badan gharqab karke

miyan-e-wasl ek chaalak KHak uDti rahegi

dukan-e-dil baDha denge agar bazar mein hum

barahna sar wahan bebak KHak uDti rahegi

koi taraj karne bastiyan aa jaega aur

zamin hoti rahegi chaak KHak uDti rahegi