safar hua na kabhi KHatm bahte pani ka

safar huā na kabhī ḳhatm bahte paanī kā

maiñ buuñd buuñd samundar banā ravānī kā

ye kah rahī hai mire barg barg kī ḳhushbū

gul-e-shafaq huuñ maiñ asrār-e-āsmānī kā

hasīn hoñToñ kī jumbish se khil uThe chehre

fazā meñ phail gayā rang ḳhush-bayānī kā

zabān-e-vaqt ne dohrā ke kar diyā maqbūl

fasāna merī nazar aur tirī javānī kā

kahe baġhair hī har baat vo samajhtā hai

ajab shu.ūr hai us meñ mizāj-dānī kā

ghuTan kā naam na ho imbisāt ho jis meñ

kareñ talāsh vo māhaul zindagānī kā

zabān-e-sher se har haal kah chalā huuñ magar

gila hai phir bhī unheñ merī be-zabānī kā

zabān-e-vaqt pe hai jis kā lahja-e-āvāz

vo shaḳhs hī to hai hero mirī kahānī kā

hayāt-o-maut kī manzil se bhī guzar kar 'sāz'

huā na ḳhatm safar ruuh kī ravānī kā

safar hua na kabhi KHatm bahte pani ka

main bund bund samundar bana rawani ka

ye kah rahi hai mere barg barg ki KHushbu

gul-e-shafaq hun main asrar-e-asmani ka

hasin honTon ki jumbish se khil uThe chehre

faza mein phail gaya rang KHush-bayani ka

zaban-e-waqt ne dohra ke kar diya maqbul

fasana meri nazar aur teri jawani ka

kahe baghair hi har baat wo samajhta hai

ajab shuur hai us mein mizaj-dani ka

ghuTan ka nam na ho imbisat ho jis mein

karen talash wo mahaul zindagani ka

zaban-e-sher se har haal kah chala hun magar

gila hai phir bhi unhen meri be-zabani ka

zaban-e-waqt pe hai jis ka lahja-e-awaz

wo shaKHs hi to hai hero meri kahani ka

hayat-o-maut ki manzil se bhi guzar kar 'saz'

hua na KHatm safar ruh ki rawani ka