safar jis mein na ho to ham-safar achchha nahin lagta

safar jis meñ na ho to ham-safar achchhā nahīñ lagtā

gavārā kar liyā jaa.e magar achchhā nahīñ lagtā

jo sach pūchho to ghar kī saarī raunaq us ke dam se hai

vo jān-e-jāñ na ho ghar meñ to ghar achchhā nahīñ lagtā

hatak-āmez nazroñ se koī dekhe jahāñ ham ko

qadam rakhnā bhī us dahlīz par achchhā nahīñ lagtā

ḳhudāvandā tirā banda jo māñge us ko mil jaa.e

dūā-e-dil ho mahrūm-e-asar achchhā nahīñ lagtā

kisī kī justujū hai jo liye phirtī hai barsoñ se

hameñ phirnā agarche dar-ba-dar achchhā nahīñ lagtā

taḳhayyul ko par-e-parvāz denā bhī zarūrī hai

baġhair us ke ḳhalāoñ kā safar achchhā nahīñ lagtā

har ik pal nit-na.e jalvoñ kī shaidā.ī hoñ jo āñkheñ

koī ik chehra un ko rāt-bhar achchhā nahīñ lagtā

kisī sarkash ke aage sar agar jabran bhī jhuk jaa.e

vabāl-e-dosh ho jaatā hai sar achchhā nahīñ lagtā

mirī rūdād-e-ġham par tursh lahje meñ kahā us ne

ye ronā roz-o-shab shām-o-sahar achchhā nahīñ lagtā

rulātā bhī hai vo zālim mujhe phir ye bhī kahtā hai

tirā dāman hai kyuuñ ashkoñ se tar achchhā nahīñ lagtā

uchhālā karte haiñ aksar 'vaqār' auroñ ke aiboñ ko

vo jin ko parda-poshī kā hunar achchhā nahīñ lagtā

safar jis mein na ho to ham-safar achchha nahin lagta

gawara kar liya jae magar achchha nahin lagta

jo sach puchho to ghar ki sari raunaq us ke dam se hai

wo jaan-e-jaan na ho ghar mein to ghar achchha nahin lagta

hatak-amez nazron se koi dekhe jahan hum ko

qadam rakhna bhi us dahliz par achchha nahin lagta

KHudawanda tera banda jo mange us ko mil jae

dua-e-dil ho mahrum-e-asar achchha nahin lagta

kisi ki justuju hai jo liye phirti hai barson se

hamein phirna agarche dar-ba-dar achchha nahin lagta

taKHayyul ko par-e-parwaz dena bhi zaruri hai

baghair us ke KHalaon ka safar achchha nahin lagta

har ek pal nit-nae jalwon ki shaidai hon jo aankhen

koi ek chehra un ko raat-bhar achchha nahin lagta

kisi sarkash ke aage sar agar jabran bhi jhuk jae

wabaal-e-dosh ho jata hai sar achchha nahin lagta

meri rudad-e-gham par tursh lahje mein kaha us ne

ye rona roz-o-shab sham-o-sahar achchha nahin lagta

rulata bhi hai wo zalim mujhe phir ye bhi kahta hai

tera daman hai kyun ashkon se tar achchha nahin lagta

uchhaala karte hain aksar 'waqar' auron ke aibon ko

wo jin ko parda-poshi ka hunar achchha nahin lagta