safar ki aaKHiri manzil ke rahbar hum hain

safar kī āḳhirī manzil ke rāhbar ham haiñ

hamāre saath chalo gard-e-rahguzar ham haiñ

likhī haiñ chehroñ pe jo surḳhiyāñ paḌho un ko

ḳhabar ho aam ki duniyā se bā-ḳhabar ham haiñ

akelā-pan hameñ mahsūs kab huā ab tak

ki dasht dasht haiñ lekin nagar nagar ham haiñ

ghanere saa.e na DhūñDo yahīñ pe dam lo zarā

ki jis kī chhāñv meñ ThanDak hai vo shajar ham haiñ

samundaroñ se kaho vo simaT ke aa jaa.eñ

ki is jahāñ meñ akele hī kūza-gar ham haiñ

vo ḳhuub shaḳhs hai dekhā hai mil ke ham ne use

magar hai ye bhī haqīqat ki ḳhūb-tar ham haiñ

safar ki aaKHiri manzil ke rahbar hum hain

hamare sath chalo gard-e-rahguzar hum hain

likhi hain chehron pe jo surKHiyan paDho un ko

KHabar ho aam ki duniya se ba-KHabar hum hain

akela-pan hamein mahsus kab hua ab tak

ki dasht dasht hain lekin nagar nagar hum hain

ghanere sae na DhunDo yahin pe dam lo zara

ki jis ki chhanw mein ThanDak hai wo shajar hum hain

samundaron se kaho wo simaT ke aa jaen

ki is jahan mein akele hi kuza-gar hum hain

wo KHub shaKHs hai dekha hai mil ke hum ne use

magar hai ye bhi haqiqat ki KHub-tar hum hain