safar ki KHak ko pairon se hum uDate gae

safar kī ḳhaak ko pairoñ se ham uḌāte ga.e

baḌe hī shauq se ham dasht meñ Tahalte ga.e

havā ne laakh kiyā ehtimām par khole

charāġh-e-zār magar zor-o-shor jalte ga.e

hameñ bhī raat kī vaadī ko paar karnā thā

so jis taraf ko gayā chāñd saath chalte ga.e

kivāḌ dil kā khulā yaad yaad aap aa.e

charāġh aañkh meñ shab qatra qatra jalte ga.e

tamām umr kaTī āh-o-zārī meñ āḳhir

zamīn-bos hue dard dard jalte ga.e

vo ashk ashk mirī aañkh se bahe shab-bhar

jidhar ko dariyā gayā malbe saath bahte ga.e

hujūm-e-shahr ikaTThā thā zer hone ko

so chashm uThtī ga.ī aur dam nikalte ga.e

jo kisht-e-jān pe utrā thā yaad kā mausam

sitāre bām-e-nazar kuud kuud marte ga.e

safar ki KHak ko pairon se hum uDate gae

baDe hi shauq se hum dasht mein Tahalte gae

hawa ne lakh kiya ehtimam par khole

charagh-e-zar magar zor-o-shor jalte gae

hamein bhi raat ki wadi ko par karna tha

so jis taraf ko gaya chand sath chalte gae

kiwaD dil ka khula yaad yaad aap aae

charagh aankh mein shab qatra qatra jalte gae

tamam umr kaTi aah-o-zari mein aaKHir

zamin-bos hue dard dard jalte gae

wo ashk ashk meri aankh se bahe shab-bhar

jidhar ko dariya gaya malbe sath bahte gae

hujum-e-shahr ikaTTha tha zer hone ko

so chashm uThti gai aur dam nikalte gae

jo kisht-e-jaan pe utra tha yaad ka mausam

sitare baam-e-nazar kud kud marte gae