safar ki mauj mein the waqt ke ghubar mein the

safar kī mauj meñ the vaqt ke ġhubār meñ the

vo log jo abhī is qarya-e-bahār meñ the

vo ek chehre pe bikhre ajab ajab se ḳhayāl

maiñ sochtā to vo ġham mere iḳhtiyār meñ the

vo hoñT jin meñ thā mīThī sī ek pyaas kā ras

maiñ jāntā to vo dariyā mire kanār meñ the

mujhe ḳhabar bhī na thī aur ittifāq se kal

maiñ us taraf se jo guzrā vo intizār meñ the

maiñ kuchh samajh na sakā merī zindagī ke vo ḳhvāb

in añkhḌiyoñ meñ jo tere the kis shumār meñ the

maiñ dekhtā thā vo aa.e bhī aur chale bhī ga.e

abhī yahīñ the abhī gard-e-roz-gār meñ the

maiñ dekhtā thā achānak ye āsmāñ ye kare

bas ek pal ko ruke aur phir madār meñ the

hazār bhes meñ sayyār mausamoñ ke safīr

tamām-umr mirī ruuh ke dayār meñ the

safar ki mauj mein the waqt ke ghubar mein the

wo log jo abhi is qarya-e-bahaar mein the

wo ek chehre pe bikhre ajab ajab se KHayal

main sochta to wo gham mere iKHtiyar mein the

wo honT jin mein tha miThi si ek pyas ka ras

main jaanta to wo dariya mere kanar mein the

mujhe KHabar bhi na thi aur ittifaq se kal

main us taraf se jo guzra wo intizar mein the

main kuchh samajh na saka meri zindagi ke wo KHwab

in ankhDiyon mein jo tere the kis shumar mein the

main dekhta tha wo aae bhi aur chale bhi gae

abhi yahin the abhi gard-e-roz-gar mein the

main dekhta tha achanak ye aasman ye kare

bas ek pal ko ruke aur phir madar mein the

hazar bhes mein sayyar mausamon ke safir

tamam-umr meri ruh ke dayar mein the