safar mein rah ke aashob se na Dar jaana

safar meñ raah ke āshob se na Dar jaanā

paḌe jo aag kā dariyā to paar kar jaanā

ye ik ishāra hai āfāt-e-nā-gahānī kā

kisī jagah se parindoñ kā kuuch kar jaanā

tumhārā qurb bhī duurī kā isti.āra hai

ki jaise chāñd kā tālāb meñ utar jaanā

tulū-e-mahr-e-daraḳhshāñ kī ik alāmat hai

uThā.e sham-e-yaqīñ us kā daar par jaanā

ham apne ishq kī ab aur kyā shahādat deñ

hameñ hamāre raqīboñ ne mo'tabar jaanā

har ek shāḳh ko pahnā gayā numū kā libās

safīr-e-mausam-e-gul kā shajar shajar jaanā

ham apnī sāda-dilī meñ bhī be-misāl rahe

jo ham-safar bhī na thā us ko rāhbar jaanā

safar mein rah ke aashob se na Dar jaana

paDe jo aag ka dariya to par kar jaana

ye ek ishaara hai aafat-e-na-gahani ka

kisi jagah se parindon ka kuch kar jaana

tumhaara qurb bhi duri ka istiara hai

ki jaise chand ka talab mein utar jaana

tulu-e-mahr-e-daraKHshan ki ek alamat hai

uThae sham-e-yaqin us ka dar par jaana

hum apne ishq ki ab aur kya shahadat den

hamein hamare raqibon ne mo'tabar jaana

har ek shaKH ko pahna gaya numu ka libas

safir-e-mausam-e-gul ka shajar shajar jaana

hum apni sada-dili mein bhi be-misal rahe

jo ham-safar bhi na tha us ko rahbar jaana