safar mein yaad na aae koi Thikana hamein

safar meñ yaad na aa.e koī Thikāna hameñ

ġham-e-zamāna lagā aisā tāziyāna hameñ

amīr-e-shahr ne kāġhaz kī kashtiyāñ de kar

samundaroñ ke safar par kiyā ravāna hameñ

jahāñ se saath zamāne ko le ke chalnā thā

vahīñ pe chhoḌ ga.ī gardish-e-zamāna hameñ

har ek samt khaḌī haiñ buland dīvāreñ

tamām shahr nazar aa.e qaid-ḳhāna hameñ

mulūk-e-ham-nafasāñ dekh kar ye dhyān aayā

ki kaash phir mile dushman vahī purānā hameñ

havā-e-sub.h-e-dil-āzār itnī tez na chal

charāġh-e-shām-e-ġharībāñ haiñ ham bujhā na hameñ

nigāh paḌtī hai phir kyuuñ parā.ī sham.oñ par

agar aziiz hai 'mohsin' charāġh-e-ḳhāna hameñ

safar mein yaad na aae koi Thikana hamein

gham-e-zamana laga aisa taziyana hamein

amir-e-shahr ne kaghaz ki kashtiyan de kar

samundaron ke safar par kiya rawana hamein

jahan se sath zamane ko le ke chalna tha

wahin pe chhoD gai gardish-e-zamana hamein

har ek samt khaDi hain buland diwaren

tamam shahr nazar aae qaid-KHana hamein

muluk-e-ham-nafasan dekh kar ye dhyan aaya

ki kash phir mile dushman wahi purana hamein

hawa-e-subh-e-dil-azar itni tez na chal

charagh-e-sham-e-ghariban hain hum bujha na hamein

nigah paDti hai phir kyun parai shamon par

agar aziz hai 'mohsin' charagh-e-KHana hamein