safar zamin hi pe tha zer-e-asman mera

safar zamīñ hī pe thā zer-e-āsmāñ merā

milā kahīñ na havā ko magar nishāñ merā

sabab hai kyā mirī taḳhlīq kā batā mujh ko

na jab hayāt hai merī na ye jahāñ merā

miTā ke dekh ye sadiyoñ kā fāsla ik din

bahut qarīb tire ghar se hai makāñ merā

maiñ āsmān meñ uḌtā huuñ shaam tak to mujhe

mirī zamīñ pe bulātā hai āshiyāñ merā

abhī to sirf karāheñ haiñ mere hoñToñ par

sunā hai giit kisī ne abhī kahāñ merā

jo baat sach hai vo kah duuñ to phir khule shāyad

ki mere yāroñ meñ hai kaun ham-zabāñ merā

mujhe zamīñ ke añdheroñ meñ pheñk kar yārab

liyā hai tū ne bahut saḳht imtihāñ merā

sunā hai shām-o-sahar intizār karte haiñ

ufuq ke paar kī bastī meñ raftagāñ merā

maiñ apnī zaat kā ab kyūñkar e'tibār karūñ

vajūd bhī hai 'adam kī taraf ravāñ merā

kisī ujāle ne bhejā nahīñ payām mujhe

sunā hai jab se añdherā hai mezbāñ merā

jo paḌh chuke haiñ mujhe un se pūchh lo 'ḳhāvar'

hai dūsroñ se judā kis qadar bayāñ merā

safar zamin hi pe tha zer-e-asman mera

mila kahin na hawa ko magar nishan mera

sabab hai kya meri taKHliq ka bata mujh ko

na jab hayat hai meri na ye jahan mera

miTa ke dekh ye sadiyon ka fasla ek din

bahut qarib tere ghar se hai makan mera

main aasman mein uDta hun sham tak to mujhe

meri zamin pe bulata hai aashiyan mera

abhi to sirf karahen hain mere honTon par

suna hai git kisi ne abhi kahan mera

jo baat sach hai wo kah dun to phir khule shayad

ki mere yaron mein hai kaun ham-zaban mera

mujhe zamin ke andheron mein phenk kar yarab

liya hai tu ne bahut saKHt imtihan mera

suna hai sham-o-sahar intizar karte hain

ufuq ke par ki basti mein raftagan mera

main apni zat ka ab kyunkar e'tibar karun

wajud bhi hai 'adam ki taraf rawan mera

kisi ujale ne bheja nahin payam mujhe

suna hai jab se andhera hai mezban mera

jo paDh chuke hain mujhe un se puchh lo 'KHawar'

hai dusron se juda kis qadar bayan mera