safhon ki qaid se unhen aazad kijiye

safhoñ kī qaid se unheñ āzād kījiye

kuchh sher-e-tar hue hoñ to irshād kījiye

shīshe se roz aatī hai bas ek hī sadā

rotī huī ye shakl kabhī shaad kījiye

siine se dil nikal ke hī aa jaa.e rū-ba-rū

ik roz utnā aap mujhe yaad kījiye

bas ek kaam aatā hai duniyā ko ḳhūb-tar

jo shaḳhs ḳhush dikhā.ī de nāshād kījiye

ye din ḳhushī kā din hai ise chhoḌ kar huzūr

ābād dil ko phir kabhī barbād kījiye

'sohil' ye ashk aañkh meñ kyoñ rok kar rakhe

āzād panchhiyoñ ko to āzād kījiye

safhon ki qaid se unhen aazad kijiye

kuchh sher-e-tar hue hon to irshad kijiye

shishe se roz aati hai bas ek hi sada

roti hui ye shakl kabhi shad kijiye

sine se dil nikal ke hi aa jae ru-ba-ru

ek roz utna aap mujhe yaad kijiye

bas ek kaam aata hai duniya ko KHub-tar

jo shaKHs KHush dikhai de nashad kijiye

ye din KHushi ka din hai ise chhoD kar huzur

aabaad dil ko phir kabhi barbaad kijiye

'sohil' ye ashk aankh mein kyon rok kar rakhe

aazad panchhiyon ko to aazad kijiye