safina zist ka tufan se nikal aaya

safīna ziist kā tūfān se nikal aayā

ki dil hai ishq ke haijān se nikal aayā

jab in kī zulfoñ ko sūñghā to andalīb-e-ḳhayāl

gulāb o nargis o raihān se nikal aayā

koī jo pyārā lage roktā huuñ hiile se

havāla dekhiye qur.ān se nikal aayā

sunā to hogā ye qissa janāb-e-yūsuf kā

piyāla bhaa.ī ke sāmān se nikal aayā

har aane vaalā ye kahtā hai mere aane se

hamārā des hai bohrān se nikal aayā

maiñ jis kā pūchhtā phirtā thā gul-faroshoñ se

vo phuul ghar ke hī dālān se nikal aayā

tumhāre ġham kī kahānī sunī to 'gīlānī'

maiñ apne hāl-e-pareshān se nikal aayā

safina zist ka tufan se nikal aaya

ki dil hai ishq ke haijaan se nikal aaya

jab in ki zulfon ko sungha to andalib-e-KHayal

gulab o nargis o raihan se nikal aaya

koi jo pyara lage rokta hun hile se

hawala dekhiye quran se nikal aaya

suna to hoga ye qissa janab-e-yusuf ka

piyala bhai ke saman se nikal aaya

har aane wala ye kahta hai mere aane se

hamara des hai bohran se nikal aaya

main jis ka puchhta phirta tha gul-faroshon se

wo phul ghar ke hi dalan se nikal aaya

tumhaare gham ki kahani suni to 'gilani'

main apne haal-e-pareshan se nikal aaya