safine jab asir-e-halqa-e-girdab hote hain

safīne jab asīr-e-halqa-e-girdāb hote haiñ

to ḳhud-sar nāḳhudā marhūn-e-mauj-e-āb hote haiñ

na DhūñDo zindagī meñ har qadam ḳhvāboñ kī tā'bīreñ

haqīqat se tahī bas ḳhvāb aksar ḳhvāb hote haiñ

zarā chheḌo to naġhme phuuT paḌte haiñ sadā ban kar

bahut se saaz ḳhud meñ tishna-e-mizrāb hote haiñ

masarrat ġham kā darmāñ hai ye saudā sochne tak hai

masarrat kī fazāoñ meñ bhī ġham shādāb hote haiñ

kam az kam Dūbne vāloñ ko ye to faḳhr hāsil hai

jo tūfāñ se ulajhte haiñ vahī ġharqāb hote haiñ

guzarne ko guzar jaatī hai yuuñ to zindagī sab kī

salīqe se magar jiine ke kuchh ādāb hote haiñ

haqārat se na dekho rah-nashīnoñ ko kabhī 'afzal'

inhīñ zarroñ meñ pinhāñ mehr-e-‘ālam-tāb hote haiñ

safine jab asir-e-halqa-e-girdab hote hain

to KHud-sar naKHuda marhun-e-mauj-e-ab hote hain

na DhunDo zindagi mein har qadam KHwabon ki ta'biren

haqiqat se tahi bas KHwab aksar KHwab hote hain

zara chheDo to naghme phuT paDte hain sada ban kar

bahut se saz KHud mein tishna-e-mizrab hote hain

masarrat gham ka darman hai ye sauda sochne tak hai

masarrat ki fazaon mein bhi gham shadab hote hain

kam az kam Dubne walon ko ye to faKHr hasil hai

jo tufan se ulajhte hain wahi gharqab hote hain

guzarne ko guzar jati hai yun to zindagi sab ki

saliqe se magar jine ke kuchh aadab hote hain

haqarat se na dekho rah-nashinon ko kabhi 'afzal'

inhin zarron mein pinhan mehr-e-‘alam-tab hote hain