safon ko joD koi ehtimam paida kar

safoñ ko joḌ koī ehtimām paidā kar

nazar ko taab de zarf-e-imām paidā kar

mujāhidāt meñ apnā maqām paidā kar

ḳhamoshiyoñ se bhī husn-e-kalām paidā kar

charāġh-pā na ho logoñ kī nukta-chīnī par

diloñ ko jiit sake vo maqām paidā kar

abhī sadā-e-talab se hai mai-kada ḳhālī

ki daur-e-jām meñ tāsīr jaam paidā kar

guzar ga.e haiñ jo auqāt un kā mātam kyā

koī salīqe kā ab to nizām paidā kar

'ravish' fazā hai mukaddar munāfarat kī jahāñ

vahīñ kī ḳhaak se ḳhushbū mudām paidā kar

safon ko joD koi ehtimam paida kar

nazar ko tab de zarf-e-imam paida kar

mujahidat mein apna maqam paida kar

KHamoshiyon se bhi husn-e-kalam paida kar

charagh-pa na ho logon ki nukta-chini par

dilon ko jit sake wo maqam paida kar

abhi sada-e-talab se hai mai-kada KHali

ki daur-e-jam mein tasir jam paida kar

guzar gae hain jo auqat un ka matam kya

koi saliqe ka ab to nizam paida kar

'rawish' faza hai mukaddar munafarat ki jahan

wahin ki KHak se KHushbu mudam paida kar