sah-pahar hi se koi shakl banati hai ye sham

sah-pahar hī se koī shakl banātī hai ye shaam

ḳhud jo rotī hai mujhe bhī to rulātī hai ye shaam

jo bhī dīvār uThātī hai girātī hai ye shaam

shaam ke vaqt bahut dhuul uḌātī hai ye shaam

Thahrī Thahrī sī thakī-hārī musībat meñ ghirī

aisā lagtā hai kahīñ duur se aatī hai ye shaam

ek be-nām sī uljhan kī tarah phirtī hai

shahr se roz mazāfāt ko jaatī hai ye shaam

ghoñsle haiñ na gharauñde koī kuTiyā na charāġh

dekhiye aaj kahāñ ḳhair manātī hai ye shaam

dūsroñ hī ke havāle se milā kartī hai

aur dukhḌā koī rozāna sunātī hai ye shaam

is kī palkoñ pe sitāroñ kā safar raushan hai

ghup añdhere meñ mujhe raah dikhātī hai ye shaam

sah-pahar hi se koi shakl banati hai ye sham

KHud jo roti hai mujhe bhi to rulati hai ye sham

jo bhi diwar uThati hai giraati hai ye sham

sham ke waqt bahut dhul uDati hai ye sham

Thahri Thahri si thaki-haari musibat mein ghiri

aisa lagta hai kahin dur se aati hai ye sham

ek be-nam si uljhan ki tarah phirti hai

shahr se roz mazafat ko jati hai ye sham

ghonsle hain na gharaunde koi kuTiya na charagh

dekhiye aaj kahan KHair manati hai ye sham

dusron hi ke hawale se mila karti hai

aur dukhDa koi rozana sunati hai ye sham

is ki palkon pe sitaron ka safar raushan hai

ghup andhere mein mujhe rah dikhati hai ye sham