sahab hun tapish-e-aftab kaise dun

sahāb huuñ tapish-e-āftāb kaise duuñ

karam se baḌh ke sitam kā javāb kaise duuñ

rumūz-e-hijr matā'-e-hijāb kaise duuñ

tumhāre haath meñ dil kī kitāb kaise duuñ

hisāb mujh se na māñgo mirī vafāoñ kā

maiñ tum ko saare jahāñ kā hisāb kaise duuñ

jihād ho to jamāl-e-vafā pe miT jā.ūñ

sarāb-e-husn ko apnā shabāb kaise duuñ

hudūd-e-zāt se aage ḳhayāl hai merā

kisī ko jān-e-ġhazal kā ḳhitāb kaise duuñ

diloñ kī baat to sab se kahī nahīñ jaatī

farishte aa.e haiñ lene hisāb kaise duuñ

mirī hayāt kā gulshan hai ḳhaar ḳhaar 'irfān'

maiñ apnī shāḳh-e-qalam ko gulāb kaise duuñ

sahab hun tapish-e-aftab kaise dun

karam se baDh ke sitam ka jawab kaise dun

rumuz-e-hijr mata'-e-hijab kaise dun

tumhaare hath mein dil ki kitab kaise dun

hisab mujh se na mango meri wafaon ka

main tum ko sare jahan ka hisab kaise dun

jihad ho to jamal-e-wafa pe miT jaun

sarab-e-husn ko apna shabab kaise dun

hudud-e-zat se aage KHayal hai mera

kisi ko jaan-e-ghazal ka KHitab kaise dun

dilon ki baat to sab se kahi nahin jati

farishte aae hain lene hisab kaise dun

meri hayat ka gulshan hai KHar KHar 'irfan'

main apni shaKH-e-qalam ko gulab kaise dun