sahaara main nahin banta agar udasi ka

sahārā maiñ nahīñ bantā agar udāsī kā

Thikāna hotā kahāñ aur kidhar udāsī kā

vabā.ī shakl banā lī hai is maraz ne ab

shikār hone lagā har bashar udāsī kā

bilā-sabab bhī kabhī dil udaas hotā hai

koī javāz nahīñ hotā har udāsī kā

har ek moḌ se rasta nayā nikaltā hai

tamām hotā nahīñ hai safar udāsī kā

maiñ terī chāragarī ko salām kartā huuñ

magar 'ilāj nahīñ chārāgar udāsī kā

bas ek baar use maiñ ne udaas dekhā thā

hai aaj tak mire dil par asar udāsī kā

ḳhushī kā apnā maza jo hai so hai apnī jagah

maza ik apnā alag hai magar udāsī kā

darūn-e-ḳhāna bhī vo hai barūn-e-ḳhāna bhī

'kamāl' ghar hai tumhārā ki ghar udāsī kā

sahaara main nahin banta agar udasi ka

Thikana hota kahan aur kidhar udasi ka

wabai shakl bana li hai is maraz ne ab

shikar hone laga har bashar udasi ka

bila-sabab bhi kabhi dil udas hota hai

koi jawaz nahin hota har udasi ka

har ek moD se rasta naya nikalta hai

tamam hota nahin hai safar udasi ka

main teri chaaragari ko salam karta hun

magar 'ilaj nahin chaaragar udasi ka

bas ek bar use main ne udas dekha tha

hai aaj tak mere dil par asar udasi ka

KHushi ka apna maza jo hai so hai apni jagah

maza ek apna alag hai magar udasi ka

darun-e-KHana bhi wo hai barun-e-KHana bhi

'kamal' ghar hai tumhaara ki ghar udasi ka