sahar se shab ka naqab utra to maine dekha

sahar se shab kā naqāb utrā to maiñ ne dekhā

zamīñ pe jab āftāb utrā to maiñ ne dekhā

shabāb meñ to nazar na us se milā sakā maiñ

hayāt kā jab shabāb utrā to maiñ ne dekhā

na sho.alagī thī na raushnī thī na dilkashī thī

falak se nīche shahāb utrā to maiñ ne dekhā

havā meñ ḳhunkī fazā meñ mastī bahaktā mausam

nazar se jām-e-sharāb utrā to maiñ ne dekhā

ḳhamosh sāhil machaltī maujeñ udaas manzar

ik aadmī zer-e-āb utrā to maiñ ne dekhā

maiñ ġhair jis ko samajh rahā thā vo maiñ hī ḳhud thā

libās-e-ġhaiz-o-itāb utrā to maiñ ne dekhā

ġhurūr us kā ġham-o-alam kī giraft meñ thā

jab us pe qahr-o-azāb utrā to maiñ ne dekhā

sahar se shab ka naqab utra to main ne dekha

zamin pe jab aaftab utra to main ne dekha

shabab mein to nazar na us se mila saka main

hayat ka jab shabab utra to main ne dekha

na shoalagi thi na raushni thi na dilkashi thi

falak se niche shahab utra to main ne dekha

hawa mein KHunki faza mein masti bahakta mausam

nazar se jam-e-sharab utra to main ne dekha

KHamosh sahil machalti maujen udas manzar

ek aadmi zer-e-ab utra to main ne dekha

main ghair jis ko samajh raha tha wo main hi KHud tha

libas-e-ghaiz-o-itab utra to main ne dekha

ghurur us ka gham-o-alam ki giraft mein tha

jab us pe qahr-o-azab utra to main ne dekha