sahifa paDh raha hun bebasi ka

sahīfa paḌh rahā huuñ bebasī kā

ta.āqub kar rahā huuñ tīrgī kā

uTho yaaro jahān-e-kun-fakāñ meñ

baḌhā.eñ aur rutba aadmī kā

mire sar ko rakho shāne pe kuchh der

ho kam daurāniya āshuftagī kā

tumhārī samt kaise lauT aa.uuñ

irāda hī nahīñ hai vāpsī kā

hamāre baḳht meñ likkhā nahīñ hai

koī lamha zamāne ne ḳhushī kā

ye kaisī ḳhvāhish-e-nākām hai jo

mujhe hone nahīñ detī kisī kā

'adan' a.asāb par taarī junūñ ko

banānā mas.ala mat zindagī kā

sahifa paDh raha hun bebasi ka

taaqub kar raha hun tirgi ka

uTho yaro jahan-e-kun-fakan mein

baDhaen aur rutba aadmi ka

mere sar ko rakho shane pe kuchh der

ho kam dauraniya aashuftagi ka

tumhaari samt kaise lauT aaun

irada hi nahin hai wapsi ka

hamare baKHt mein likkha nahin hai

koi lamha zamane ne KHushi ka

ye kaisi KHwahish-e-nakaam hai jo

mujhe hone nahin deti kisi ka

'adan' aasab par tari junun ko

banana masala mat zindagi ka