sahne ko hijr jab bhi tamanna mazid ki

sahne ko hijr jab bhī tamannā mazīd kī

maiñ ne vajūd-e-sher se lazzat kashīd kī

dekhā thā raat ḳhvāb meñ sahrā-mizāj shaḳhs

nagrī bhī lag rahī thī vo ḳhvāja farīd kī

ai muftiyān-e-shahr tumheñ ilm hī nahīñ

logoñ ne mere chāñd ko dekhā to iid kī

ye sunnat-e-husain hai so is liye bhī maiñ

bai.at qubūl kī na kisī bhī yazīd kī

ḳhushiyāñ to dastiyāb thiiñ bāzār meñ magar

dānista maiñ ne hijr kī daulat ḳharīd kī

sahne ko hijr jab bhi tamanna mazid ki

main ne wajud-e-sher se lazzat kashid ki

dekha tha raat KHwab mein sahra-mizaj shaKHs

nagri bhi lag rahi thi wo KHwaja farid ki

ai muftiyan-e-shahr tumhein ilm hi nahin

logon ne mere chand ko dekha to id ki

ye sunnat-e-husain hai so is liye bhi main

baiat qubul ki na kisi bhi yazid ki

KHushiyan to dastiyab thin bazar mein magar

danista main ne hijr ki daulat KHarid ki