sahne ko to sah jaen gham-e-kaun-o-makan tak

sahne ko to sah jaa.eñ ġham-e-kaun-o-makāñ tak

ai ḳhāliq-e-har-dard magar phir bhī kahāñ tak

pahuñche na kahīñ dīda-e-ḳhūñ-nāba-fashāñ tak

vo harf-e-shikāyat nahīñ aayā jo zabāñ tak

ye merī nigāhoñ ke banā.e hue manzar

kambaḳht vahīñ tak haiñ nazar jaa.e jahāñ tak

ik rasm-e-vafā thī vo zamāne ne uThā dī

ik zahmat-e-be-kār thī uThtī bhī kahāñ tak

tum muatamid-e-rāz the kis tarah se pahuñchī

hairat hai mirī baat zamāne kī zabāñ tak

chhūTe jo qafas se to vahī qaid-e-chaman thī

āzād yahāñ tak the giraftār yahāñ tak

tasvīr-e-ruḳh-e-yār khiñchī jaatī hai 'yāvar'

miltī hai fareb-e-ġham-e-daurāñ se kahāñ tak

sahne ko to sah jaen gham-e-kaun-o-makan tak

ai KHaliq-e-har-dard magar phir bhi kahan tak

pahunche na kahin dida-e-KHun-naba-fashan tak

wo harf-e-shikayat nahin aaya jo zaban tak

ye meri nigahon ke banae hue manzar

kambaKHt wahin tak hain nazar jae jahan tak

ek rasm-e-wafa thi wo zamane ne uTha di

ek zahmat-e-be-kar thi uThti bhi kahan tak

tum muatamid-e-raaz the kis tarah se pahunchi

hairat hai meri baat zamane ki zaban tak

chhuTe jo qafas se to wahi qaid-e-chaman thi

aazad yahan tak the giraftar yahan tak

taswir-e-ruKH-e-yar khinchi jati hai 'yawar'

milti hai fareb-e-gham-e-dauran se kahan tak