sahra base hue the hamari nigah mein

sahrā base hue the hamārī nigāh meñ

ḳhema lagā na paa.e ham āb-o-giyāh meñ

sadiyāñ hamārī raah ko roke khaḌī rahīñ

aur zindagī guzartī rahī sāl-o-māh meñ

bas jaate ham kahīñ bhī samundar ke darmiyāñ

aayā magar na koī jazīra hī raah meñ

ik baar haath lag ga.e us andhī bhiiḌ ke

vāpas na lauT paa.e ham apnī panāh meñ

vaqt aur maqām se na kabhī ham guzar sake

guzre maqām-o-vaqt faqat rasm-o-rāh meñ

kuchh der zer-e-pā jo Thahartī koī zamīñ

ham bhī qayām karte kisī jā.e-gāh meñ

'betāb' pastiyoñ se nikal hī na paa.e ham

kyā kyā bulandiyāñ thiiñ hamārī nigāh meñ

sahra base hue the hamari nigah mein

KHema laga na pae hum aab-o-giyah mein

sadiyan hamari rah ko roke khaDi rahin

aur zindagi guzarti rahi sal-o-mah mein

bas jate hum kahin bhi samundar ke darmiyan

aaya magar na koi jazira hi rah mein

ek bar hath lag gae us andhi bhiD ke

wapas na lauT pae hum apni panah mein

waqt aur maqam se na kabhi hum guzar sake

guzre maqam-o-waqt faqat rasm-o-rah mein

kuchh der zer-e-pa jo Thaharti koi zamin

hum bhi qayam karte kisi jae-gah mein

'betab' pastiyon se nikal hi na pae hum

kya kya bulandiyan thin hamari nigah mein