sahra mein ab to ja kar ek ghar banaya jae

sahrā meñ ab to jā kar ik ghar banāyā jaa.e

bastī se bhar gayā dil jañgal basāyā jaa.e

kyoñ apne ġham kī un se hālat bayān kar ke

miTTī meñ aabrū ko apnī milāyā jaa.e

saudā-e-āshiqī kā hai aaj phir taqāzā

phir qais ke junūñ kā jalva dikhāyā jaa.e

aao ki shaiḳh jī ko sāġhar dikhā ke dekheñ

ik baar shaiḳh ko bhī ab āzmāyā jaa.e

shāyad hamāre ghar par vo bhuul kar hī aa.eñ

is āsare pe apne ghar ko sajāyā jaa.e

us sang-dil ke 'shā.eq' badle hue haiñ tevar

apnā fasāna-e-dil kyoñ kar sunāyā jaa.e

sahra mein ab to ja kar ek ghar banaya jae

basti se bhar gaya dil jangal basaya jae

kyon apne gham ki un se haalat bayan kar ke

miTTi mein aabru ko apni milaya jae

sauda-e-ashiqi ka hai aaj phir taqaza

phir qais ke junun ka jalwa dikhaya jae

aao ki shaiKH ji ko saghar dikha ke dekhen

ek bar shaiKH ko bhi ab aazmaya jae

shayad hamare ghar par wo bhul kar hi aaen

is aasare pe apne ghar ko sajaya jae

us sang-dil ke 'shaeq' badle hue hain tewar

apna fasana-e-dil kyon kar sunaya jae