sahra mein hun junun ke bhi aasar hi nahin

sahrā meñ huuñ junūñ ke bhī āsār hī nahīñ

sar phoḌne ke vāste dīvār hī nahīñ

jis kī davā-e-dil kī zarūrat ke vāste

ham chārāgar hue to vo bīmār hī nahīñ

apne vatan kī ḳhaak liye phir rahā huuñ maiñ

us kī vafāoñ se mujhe inkār hī nahīñ

taqdīr ke haiñ khel javāñ ishq jab huā

tab khelne ke vāste mañjhdār hī nahīñ

ham rah-navard-e-shauq ko sahrā hī Thiik hai

kyā lutf mai-kade meñ agar yaar hī nahīñ

sad iftiḳhār ġhairoñ ko dīdār-e-ām hai

sad-haif ham ko dāvat-e-dīdār hī nahīñ

be-bas hī kar diyā hai irādoñ ne ai 'suhail'

qismat ne kar diyā mujhe lā-chār hī nahīñ

sahra mein hun junun ke bhi aasar hi nahin

sar phoDne ke waste diwar hi nahin

jis ki dawa-e-dil ki zarurat ke waste

hum chaaragar hue to wo bimar hi nahin

apne watan ki KHak liye phir raha hun main

us ki wafaon se mujhe inkar hi nahin

taqdir ke hain khel jawan ishq jab hua

tab khelne ke waste manjhdar hi nahin

hum rah-naward-e-shauq ko sahra hi Thik hai

kya lutf mai-kade mein agar yar hi nahin

sad iftiKHar ghairon ko didar-e-am hai

sad-haif hum ko dawat-e-didar hi nahin

be-bas hi kar diya hai iradon ne ai 'suhail'

qismat ne kar diya mujhe la-chaar hi nahin