sahra mein jo diwane se baad-e-saba uljhi

sahrā meñ jo dīvāne se bād-e-sabā uljhī

har mauj-e-gul-e-tar se vo zulf-e-dotā uljhī

ilzām nahīñ tujh par ai bādiya-paimā.ī

dīvāne kī qismat se sahrā kī havā uljhī

pāband-e-nazākat thī nairañgī-e-gul-chīnī

surḳhī-e-gul-e-tar se hāthoñ kī hinā uljhī

yā husn-e-kashish meñ jaañ aur aap ne Daalī hai

yā shoḳhī-e-fitrat hai dar-parda hayā uljhī

ḳhāmosh tajallī kī fitrat maiñ samajhtā huuñ

kyuuñ ḳhirman-e-dil se hī ai barq-e-adā uljhī

dil meñ tirī yādoñ ne vo bijliyāñ chamkā.īñ

āñkhoñ se marī aa kar sāvan kī ghaTā uljhī

zāmin mirī uljhan ke uljhe hue gesū haiñ

be-vaj.h mirī 'jumbish' kab tab-e-rasā uljhī

sahra mein jo diwane se baad-e-saba uljhi

har mauj-e-gul-e-tar se wo zulf-e-dota uljhi

ilzam nahin tujh par ai baadiya-paimai

diwane ki qismat se sahra ki hawa uljhi

paband-e-nazakat thi nairangi-e-gul-chini

surKHi-e-gul-e-tar se hathon ki hina uljhi

ya husn-e-kashish mein jaan aur aap ne Dali hai

ya shoKHi-e-fitrat hai dar-parda haya uljhi

KHamosh tajalli ki fitrat main samajhta hun

kyun KHirman-e-dil se hi ai barq-e-ada uljhi

dil mein teri yaadon ne wo bijliyan chamkain

aankhon se mari aa kar sawan ki ghaTa uljhi

zamin meri uljhan ke uljhe hue gesu hain

be-wajh meri 'jumbish' kab tab-e-rasa uljhi