sahra mein jo hum aakar Thahre hain to Dar kya hai

sahrā meñ jo ham aakar Thahre haiñ to Dar kyā hai

ham ḳhāna-ba-doshoñ kā sāmān-e-safar kyā hai

kohre kā sā ik aalam aatā hai nazar ham ko

vādī-e-shab-e-ġham meñ kyā jaane kidhar kyā hai

mehr-o-mah-o-anjum se aage hai tirī manzil

ma.alūm nahīñ tujh ko parvāz-e-bashar kyā hai

ye silsila yādoñ kā vo qāfila jalvoñ kā

tārīki-e-shab kyā hai aur nūr-e-sahar kyā hai

āshufta-mizājī kā kyā us se kareñ shikva

dīvāne ko ḳhud apnī hālat kī ḳhabar kyā hai

jhūTe haiñ sabhī rishte kyā in kā yaqīñ 'ahmad'

aalam hai sarāboñ kā aur pesh-e-nazar kyā hai

sahra mein jo hum aakar Thahre hain to Dar kya hai

hum KHana-ba-doshon ka saman-e-safar kya hai

kohre ka sa ek aalam aata hai nazar hum ko

wadi-e-shab-e-gham mein kya jaane kidhar kya hai

mehr-o-mah-o-anjum se aage hai teri manzil

malum nahin tujh ko parwaz-e-bashar kya hai

ye silsila yaadon ka wo qafila jalwon ka

tariki-e-shab kya hai aur nur-e-sahar kya hai

aashufta-mizaji ka kya us se karen shikwa

diwane ko KHud apni haalat ki KHabar kya hai

jhuTe hain sabhi rishte kya in ka yaqin 'ahmad'

aalam hai sarabon ka aur pesh-e-nazar kya hai