sahra-o-dasht-o-sarw-o-saman ka sharik tha

sahrā-o-dasht-o-sarv-o-saman kā sharīk thā

vo dard kī davā thā dukhan kā sharīk thā

vo kyā samajh sakegā mire ishq kā maqām

jo ruuh ke safar meñ badan kā sharīk thā

dekhī na ham ne jis kī jabīñ par kabhī shikan

vo dil kī ek ek chubhan kā sharīk thā

ik lamhe ko vo aayā tasavvur meñ to lagā

jaise vo saare din kī thakan kā sharīk thā

ḳhāmoshiyoñ se aaj haiñ ham mahv-e-guftugū

vo saath hī nahīñ jo suḳhan kā sharīk thā

allāh us charāġh ko raushan rakhe sadā

jo tīrgī meñ pahlī kiran kā sharīk thā

sairāb kar gayā kisī āñgan ko jo 'adīl'

vo merī pyaas merī ghuTan kā sharīk thā

sahra-o-dasht-o-sarw-o-saman ka sharik tha

wo dard ki dawa tha dukhan ka sharik tha

wo kya samajh sakega mere ishq ka maqam

jo ruh ke safar mein badan ka sharik tha

dekhi na hum ne jis ki jabin par kabhi shikan

wo dil ki ek ek chubhan ka sharik tha

ek lamhe ko wo aaya tasawwur mein to laga

jaise wo sare din ki thakan ka sharik tha

KHamoshiyon se aaj hain hum mahw-e-guftugu

wo sath hi nahin jo suKHan ka sharik tha

allah us charagh ko raushan rakhe sada

jo tirgi mein pahli kiran ka sharik tha

sairab kar gaya kisi aangan ko jo 'adil'

wo meri pyas meri ghuTan ka sharik tha