sahra sahra ghum rahe hain kya kya swang rachae hain

sahrā sahrā ghuum rahe haiñ kyā kyā svāñg rachā.e haiñ

aaj tumhāre shahr meñ pyāre jogī ban kar aa.e haiñ

chāroñ or añdherā pā kar man kī jot jagā.e haiñ

jo 'ālam meñ rusvā kar de aisā rog lagā.e haiñ

ġham kī bāteñ kahte kahte hoñToñ ko sī lete haiñ

kitnā bojh hai bhārī dil par jo barsoñ se uThā.e haiñ

ham haiñ tanhā rain añdherī tūfānoñ kā jhoñkā bhī

chalte hī bujh jaate haiñ sab jitne charāġh jalā.e haiñ

'sūfī' jī dīvāne Thahre aql-o-hosh kī baat kahāñ

lekin vo bhī tujh se bichhaḌ kar aaj bahut pachhtā.e haiñ

sahra sahra ghum rahe hain kya kya swang rachae hain

aaj tumhaare shahr mein pyare jogi ban kar aae hain

chaaron or andhera pa kar man ki jot jagae hain

jo 'alam mein ruswa kar de aisa rog lagae hain

gham ki baaten kahte kahte honTon ko si lete hain

kitna bojh hai bhaari dil par jo barson se uThae hain

hum hain tanha rain andheri tufanon ka jhonka bhi

chalte hi bujh jate hain sab jitne charagh jalae hain

'sufi' ji diwane Thahre aql-o-hosh ki baat kahan

lekin wo bhi tujh se bichhaD kar aaj bahut pachhtae hain