sahra se puchhta hai koi sogwar peD

sahrā se pūchhtā hai koī sogvār peḌ

kyā ab bhī DhūñDte haiñ mujhe sabza-zār peḌ

miTTī meñ itnī taab kahāñ peḌ ban sake

dīvār se nikāl koī sāya-dār peḌ

tahzīb apnī aap numū kar rahī hai aaj

pīpal se ug paḌe haiñ khajūroñ ke chaar peḌ

baḌhte chalo ki raah nikal aa.e ḳhud-baḳhud

ugte haiñ jaise dost sar-e-kohsār peḌ

maiñ bhī zamīñ kī nasl-kushī meñ sharīk huuñ

karte nahīñ tabhī to mirā e.atibār peḌ

phūloñ kī justujū meñ hathelī hai taar taar

duniyā ho jaise dasht meñ ik ḳhār-dār peḌ

bo.e haiñ maiñ ne biij ravayyoñ kī fasl ke

dekhegī aglī nasl yahāñ be-shumār peḌ

ai vaqt ai aziim daraḳhtoñ kī ḳhud-navisht

fihrist meñ hai ab bhī koī shāndār peḌ

us ne chhuā thā baaġh meñ bas ek peḌ ko

ab tak khaḌe hue haiñ vahāñ mushk-bār peḌ

gautam ne apnī zaat ke irfān ke liye

insān ke bajā.e kiyā iḳhtiyār peḌ

tārīḳh inqalāb kī muhtāj kab huī

patthar se ug paḌe haiñ ka.ī shāhkār peḌ

vahshat kī tez dhuup ne jhulsā ke rakh diyā

yā-rab koī falak se hī mujh par utaar peḌ

hijrat ke vaqt baap ne mujh se kahā 'munīr'

sāmāñ to sab sameT liyā aur yaar peḌ

sahra se puchhta hai koi sogwar peD

kya ab bhi DhunDte hain mujhe sabza-zar peD

miTTi mein itni tab kahan peD ban sake

diwar se nikal koi saya-dar peD

tahzib apni aap numu kar rahi hai aaj

pipal se ug paDe hain khajuron ke chaar peD

baDhte chalo ki rah nikal aae KHud-baKHud

ugte hain jaise dost sar-e-kohsar peD

main bhi zamin ki nasl-kushi mein sharik hun

karte nahin tabhi to mera eatibar peD

phulon ki justuju mein hatheli hai tar tar

duniya ho jaise dasht mein ek KHar-dar peD

boe hain main ne bij rawayyon ki fasl ke

dekhegi agli nasl yahan be-shumar peD

ai waqt ai azim daraKHton ki KHud-nawisht

fihrist mein hai ab bhi koi shandar peD

us ne chhua tha bagh mein bas ek peD ko

ab tak khaDe hue hain wahan mushk-bar peD

gautam ne apni zat ke irfan ke liye

insan ke bajae kiya iKHtiyar peD

tariKH inqalab ki muhtaj kab hui

patthar se ug paDe hain kai shahkar peD

wahshat ki tez dhup ne jhulsa ke rakh diya

ya-rab koi falak se hi mujh par utar peD

hijrat ke waqt bap ne mujh se kaha 'munir'

saman to sab sameT liya aur yar peD